ངའི་ཉམས་མྱོང་གི་ཐོག་ནས་ཞུས་ན། ང་ནི་གསར་བརྗེ་ཅན་ཞིག་ཡིན། ཡིན་ནའི་སེམས་གཏིང་ནས་བཤད་ན་ངས་སྡིག་པ་མང་པོ་གསག་པ་རེད་སྙམ་གྱི་འདུག དེར་བརྟེན་ཚེ་རྗེས་མ་འདི་རྒྱ་མིར་མ་སྐྱེས་པ་དང་རྒྱ་མིའི་ས་ཆར་མ་སྐྱེས་པའི་རྟག་ཏུ་གསོལ་བ་སྨོན་ལམ་འདེབས་ཀྱི་ཡོད། ང་དེ་སྔོན་འབྲས་སྤུངས་དགོན་པའི་གྲ་པ་ཞིག་ཡིན། ཡིན་ནའི་ལོ་མང་པོ་འདི་འདྲ་སོང་བའི་རྗེས་གྲ་ཆས་བསྐྱར་དུ་གྱོན་གྱི་མེད། འདི་གང་ཡིན་ཞུས་ན། ངས་གསར་བརྗེ་བྱེད་མྱོང་ཡོད་པ་དང་གྲོང་མི་ལྷན་ཁང་ལ་ལས་ཀ་བྱེད་མྱོང་ཡོད་ལ། ཡུལ་དམག་ཡང་བྱེད་མྱོང་ཡོད། དེ་བཞིན་རིག་གནས་གསར་བརྗེ་ཆེན་པོའི་སྐབས་ལ་བྱ་བ་ངན་པ་མང་པོ་བྱས་ཡོད་པས་བསྐྱར་དུ་གྲ་ཆས་གྱོན་པ་ཡིན་ཚེ་ཏག་ཏག་བསྡད་ཀྱི་མ་རེད། གྲ་ཆས་གྱོན་པའི་རྗེས་སྡོམ་པ་མང་པོ་སྲུང་དགོས་ཀྱི་ཡོད་པས་གུས་པར་བསྐྱར་དུ་གྲ་ཆས་གྱོན་པའི་ཐོབ་ཐང་མེད་པ་རེད། དངོས་གནས་བྱས་ན་གྲ་ཆས་གྱོན་འདོད་ཆེན་པོ་ཡོད། ཡིན་ནའི་ངས་གྱོན་ན་འགྲིག་གི་མ་རེད། གང་ཡིན་ཞེ་ན་ང་ལ་ཐོབ་ཐང་འདི་མེད་པར་ངོས་འཛིན་བྱེད་ཀྱི་ཡོད། རྙིང་པ་བཞི་ཟེར་བ་གཏོར་བའི་སྐབས་ངས་ཀཀྞི་སྒོ་བཞི་གཏོར་མྱོང་ཡོད་པ་དང༌། ངས་ད་དུང་རྒན་ལགས་ཀྱིས་ཉར་ཚགས་གནང་བའི་ཕྱག་དཔེ་ཚང་མ་མེར་བསྲེགས་བཏང་མྱོང་ཡོད། ཕྱག་དཔེ་དེ་ཚོ་ཚང་མ་སྤྱི་ལོ་༡༩༥༩ལོའི་རྗེས་རྒན་ལགས་ཀྱིས་གསང་བའི་ངང་ཕོ་བྲང་པོ་ཏཱ་ལ་ནས་འཁྱེར་ཕེབས་པ་ཤ་སྟག་ཡིན་པ་དང་འདི་ནི་རྗེ་ཙོང་ཁ་པའི་གསུང་རབ་ཡིན་པས་ཧ་ཅང་གི་རྩ་ཆེན་པོ་རེད། ཡིན་ནའི་རིག་གནས་གསར་བརྗེ་བྱེད་པའི་སྐབས་ཉར་ཚགས་བྱེད་མི་ནུས་པར་མེར་བསྲེགས་བཏང་པ་ཡིན། སྐབས་དེ་དུས་བལ་པོའི་མི་གཅིག་དང་ང་གཉིས་ཀྱིས་མཉམ་དུ་མེར་བསྲེགས་བཏང་བ་དང་ང་གཉིས་གཉིས་ཀ་མིག་ཆུ་ཤོར་བྱུང༌། མེར་བསྲེགས་བཏང་བའི་ཐལ་རྡུལ་ལྷ་སའི་སྐྱིད་ཆུའི་ནང་དབྱུགས་ཏེ་སྐབས་དེ་དུས་ང་ཚོས་ཆོས་ལུགས་འདི་འདྲ་བྱས་ཏེ་བློས་བཏང་པ་རེད།

གལ་ཏེ་གསར་བརྗེ་མེད་པ་དང་རིག་གནས་གསར་བརྗེ་མེད་པ་ཡིན་ན་ངའི་བསམ་པར་གུས་པའི་མི་ཚེ་འདི་དགེ་འདུན་པ་ཡག་པོ་ཞིག་དང་མི་ཚེ་གཅིག་རིང་གྲ་ཆས་གྱོན་ནས་ཡོད་པ་རེད་སྙམ་གྱི་འདུག དགོན་པ་ཡང་ཡག་པོ་གནས་ཐུབ་ཡོད་པ་དང་ངས་དགོན་པའི་ནང་བློ་རྩེ་གཅིག་སྒྲིམ་གྱིས་དཔེ་ཆ་བལྟས་ནས་བསྡད་ཀྱི་རེད། ཡིན་ནའི་གསར་བརྗེ་སླེབས་ཏེ་གྲ་ཆས་གྱོན་རྒྱུ་མེད་པ་བཟོས་པ་དང་ངས་བུད་མེད་འཚལ་མྱོང་མེད་པ་དང་གྲ་པ་ལོག་མེད་པ་ཡིན་རུང་བསྐྱར་དུ་གྲ་ཆས་གྱོན་པའི་ཐོབ་ཐང་མེད་པ་རེད། འདི་ནི་ངའི་མི་ཚེའི་ནང་སེམས་སྡུག་ཆེ་ཤོས་འདི་ཡིན་ཞེས་བརྗོད་བྱུང༌།